Desde asociacións de persoas con cegueira ata comités e centros comprometidos con xente con diversas discapacidades, no Grupo Social ONCE facemos a nosa pequena achega en ampliar as nosas actividades para que en todo o mundo haxa un obxectivo común de lograr unhas condicións de vida óptimas para o desenvolvemento das persoas, independentemente das súas circunstancias.
A actividade internacional do Grupo Social ONCE: Un paso cara a inclusión social e un compromiso coa sostibilidade
1. Un modelo social e económico único no mundo
O carácter único do noso modelo social impúlsanos a comprometernos cos dereitos das persoas con discapacidade, o xogo socialmente responsable e o desenvolvemento dunha economía social de impacto arredor do mundo. É por iso polo que, desde o Grupo Social ONCE, traballamos día a día para contribuír á mellora das oportunidades de inclusión e a plena autonomía das persoas cegas e con outras discapacidades de Europa, América Latina e outras partes do planeta.
O obxectivo da nosa actividade internacional é poñer ao servizo dos nosos socios internacionais un modelo global de inclusión, aberto, sostible e único, que vela pola autonomía e a visibilidade das persoas con discapacidade e que conta cun gran recoñecemento internacional, reforzado pola concesión de galardóns de tanto prestixio coma o premio Cidadán Europeo 2016 do Parlamento Europeo.
Convencidos de que o noso modelo de inclusión pode contribuír a xerar valor a nivel global, especialmente preto das persoas, desenvolvemos a nosa acción internacional a través da asistencia técnica e a participación activa na creación de contornos de cooperación máis inclusivos, a través de partenariados con organismos multilaterais, fundacións e plataformas internacionais de dereitos das persoas con discapacidade, emprego, xogo responsable, cultura, turismo, economía social, multinacionais e demais actores do ámbito internacional.
Como entidade referente da economía social, traballamos a nivel internacional para sentar as bases dunha sociedade que inclúa ás persoas con discapacidade no ámbito laboral e social.
Xeramos, da man de todos os nosos aliados, oportunidades para crear contornos máis inclusivos que inclúan a discapacidade nas súas axendas, que promovan unha sociedade global con menos barreiras de accesibilidade e unha sociedade máis aberta que fomente o pleno desenvolvemento das persoas con discapacidade.
Impulsamos unha internacionalización e xeración de oportunidades propias do Grupo Social ONCE a través do seu modelo empresarial, fundacional, de emprego e de inclusión social. Un modelo que, progresivamente, obtén unha dimensión mundial e que forma parte do recoñecemento de España e da Unión Europea.
2. As bases da nosa actividade internacional
O marco no que a actividade do Grupo Social ONCE traballa a nivel internacional susténtase en:
-
A Convención de Nacións Unidas sobre os Dereitos das Persoas con Discapacidade
-
As liñas de actuación da Axenda 2030 de Obxectivos de Desenvolvemento Sostible
-
A Estratexia Europea sobre os Dereitos das Persoas con Discapacidade 2021-2030
-
A Estratexia Internacional e europea do Grupo Social ONCE
Son piares que estruturan o desenvolvemento dun modelo de impacto social, que se estende de forma sincronizada desde ONCE, Fundación ONCE e Ilunion baixo a coordinación do Consello Xeral da ONCE. Todo iso co propósito de defender, salientar e impulsar os dereitos dos máis de mil millóns de persoas que teñen algunha discapacidade no mundo.
3. O ámbito da nosa actuación
O ámbito das nosas actuacións espállase por diversas rexións arredor do mundo, reivindicando a discapacidade cos enfoques de dereitos humanos, accesibilidade universal, inclusión educativa e laboral e acceso á información, a cultura e o transporte, todo iso de xeito transversal.
OTAE: un compromiso europeo
O alcance do noso compromiso esténdese por toda a Unión Europea e afiánzase día a día a través das múltiples interaccións coas diversas institucións europeas.
Baixo a coordinación da nosa Oficina Técnica para Asuntos Europeos (OTAE), construímos unha canle de colaboración constante e bidireccional coa Unión Europea no seu conxunto (Parlamento, Comisión e Consello) á que sumamos outras entidades, desde organizacións de persoas con discapacidade visual ata plataformas de loterías, da economía social e do terceiro sector. Conséguense así representar os dereitos e intereses de máis de 87 millóns de cidadáns europeos que teñen algunha discapacidade.
FOAL: unha cooperación transatlántica
Desde o Grupo Social ONCE tampouco nos esquecemos das persoas cegas ou con baixa visión de Iberoamérica. Alí empezamos a traballar a finais do século pasado e en 1998 puxemos en marcha unha fundación específica para promover a plena inclusión social das persoas con discapacidade visual de América Latina (FOAL), intentando contribuír ao goce pleno e en condicións de igualdade dos seus dereitos humanos e liberdades fundamentais. E apoiámonos en todos os instrumentos de cooperación internacional para o desenvolvemento ao noso alcance e sobre a base da Convención de Nacións Unidas sobre os Dereitos das Persoas con Discapacidade e da Axenda 2030 para o Desenvolvemento Sostible.
Estendemos a nosa cooperación por 19 países de Latinoamérica mediante programas de educación, inclusión laboral e fortalecemento institucional de organizacións públicas, privadas ou da sociedade civil. Así mesmo, enfocamos moitas da nosas actuacións no campo da rehabilitación e habilitación das persoas con discapacidade visual, e organizamos actividades tanto recreativas e deportivas coma de investigación e aplicación de novas tecnoloxías por gran parte do territorio.
A nosa misión principal é reducir o círculo de pobreza e exclusión asociado á discapacidade potenciando as capacidades das persoas, apoiando ás súas e traballando de modo coordinado cos estados, centros educativos, empresas, entidades públicas e/ou privadas. Poñemos especial interese nos colectivos máis vulnerables, coma as rapazas e mulleres con discapacidade visual -as que viven en contornos rurais-, á poboación indíxena e ás persoas con xordocegueira.
A rexión euromediterránea: unha zona de intercambio para que os dereitos das persoas con discapacidade estean representados
Desde o Grupo Social ONCE, xunto coa Unión polo Mediterráneo (UPM), colaboramos estreitamente para reivindicar os dereitos humanos, o emprego, a accesibilidade, o turismo e a igualdade de xénero como vías clave para a inclusión das persoas con discapacidade nos países da zona euromediterránea, por medio da promoción de proxectos de cooperación. Traballamos para combater os desafíos e limitacións das persoas con discapacidade e para fortalecer o noso vínculo cos países da rexión, co fin de construír todo tipo de alianzas e sinerxías a favor da inclusión.
4. A nosas áreas executivas no exterior
ONCE: loterías responsables para servizos sociais comprometidos
Desde a área Internacional de Xogo da ONCE procuramos difundir o noso modelo de lotería social, segura y responsable máis aló das nosas fronteiras, cunha estrutura única no mundo que destaca polo seu carácter diferencial dentro do sector de xogo.
Traballamos día a día para dar a coñecer o modelo da ONCE a través da súa participación en todas as asociacións internacionais sectoriais ás que pertence (European Lotteries, World Lottery Association e a Corporación Iberoamericana de Loterías), así coma en eventos e foros internacionais, presenciais ou dixitais, relacionados co sector do xogo responsable, seguro e social.
No Grupo Social ONCE consideramos fundamental traballar na concienciación e sensibilización social, impulsando o desenvolvemento de proxectos de xogo a escala mundial, que xeren novas oportunidades para as persoas con discapacidade. Para iso promovemos acordos con operadores de lotería e asociacións de persoas con discapacidade doutros países que permitan desenvolver mercados de xogo de forma sostible, conciliando a rendibilidade económica coa contribución social.
Os servizos sociais da ONCE están na vangarda, ofrecendo un marco de apoio a estudantes cegos ou con baixa visión Erasmus ou de América Latina, así como apoiando de forma decidida a inclusión en España de persoas refuxiadas de conflitos, tales coma a guerra en Ucraína ou apoiando a educación de nenos cegos nos campos de refuxiados saharauís.
Fundación ONCE: formación, o emprego e a accesibilidade universal
A nivel internacional, articulamos un instrumento de cooperación para o desenvolvemento a través da nosa Fundación ONCE para a Cooperación e Inclusión Social de Persoas con Discapacidade. Un ambicioso proxecto que, desde 1988, promove, favorece e impulsa proxectos enmarcados no ámbito da formación, o emprego e a accesibilidade universal, co fin de mellorar as condicións de vida das persoas con outras discapacidades dentro e fora de España.
Por medio do noso modelo Inserta, xunto ao apoio de socios locais, promovemos a inserción laboral das persoas con discapacidade tanto en América Latina coma en Portugal e Marrocos. Así mesmo, esforzámonos para xerar oportunidades formativas e fomentar a accesibilidade universal a nivel mundial.
Fundación ONCE é tamén un modelo internacional no desenvolvemento de coñecemento no ámbito da accesibilidade para persoas con discapacidade, incluíndo partenariados estratéxicos con grandes empresas tecnolóxicas como Microsoft ou organismos internacionais coma a Organización Mundial do Turismo.
Ilunion: economía social, persoas, excelencia, transformación e sostibilidade
A través do noso modelo Ilunion, damos a coñecer un grupo empresarial único no mundo, que destaca pola transformación e a excelencia enfocado nas persoas e a sostibilidade.
Por medio da instauración de diferentes establecementos a nivel internacional, seguimos a xerar emprego digno e de calidade máis aló da nosas fronteiras, demostrando que a rendibilidade social e económica son viables dentro e fora de España.
Ilunion, a través das súas lavanderías industriais, estableceuse en Colombia con dúas lavanderías que xeran emprego digno para persoas con discapacidade. Tamén se transformou nun socio estratéxico das organizacións multilaterais americanas e europeas para promover un desenvolvemento accesible para todos.
5. Un sistema de alianzas e partenariados singular
No Grupo Social ONCE establecemos unha rede de alianzas estratéxicas internacionais, onde participamos en máis de 40 redes internacionais que representan o movemento de persoas con discapacidade (a Unión Mundial de Cegos ou a Unión Europea de Cegos); a economía social (Economía Social Europea ou Philea); a Lotería con propósito (as Asociacións Mundial e Europea de Lotería); os servizos para as persoas con discapacidade (a Asociación Europea de Servizos para Persoas con Discapacidade ou o Consorcio Internacional para a Educación de Persoas con Discapacidade Visual), así coma órganos de harmonización internacional (Consellos Internacional e Iberoamericano do Braille ou o Consorcio Daisy).
Do mesmo xeito, establecemos alianzas con organismos internacionais e multilaterais tales coma o Banco Mundial, o Banco Interamericano de Desenvolvemento, o Banco Europeo de Investimentos ou o Banco de Desenvolvemento de América Latina, entre outros. Ademais, o partenariado estratéxico diríxese cara axencias de Nacións Unidas tales coma UNICEF ou a Comisión Económica para América Latina e o Caribe (CEPAL).
Dentro das alianzas estratéxicas destaca o Programa Iberoamericano de Discapacidade, creado dentro do esquema da Secretaría Xeral Iberoamericana, cuxa asistencia técnica recae no Grupo Social ONCE. A través dun fondo multipaís, traballa na calidade normativa da rexión en relación coas persoas con discapacidade.
